Елорда көшелері дизайн-кодқа сай емес жарнамадан тазартыла бастады
Aстанада қала келбетін дизайн-код бойынша ретке келтіру жұмысы қарқынды жүріп жатыр, деп хабарлайды елорда әкімдігінің ресми сайты
Бір апта ішінде қала бойынша 800-ге жуық заңсыз ілінген маңдайша мен жарнама банері алынып тасталды. Олардың барлығы 2019 жылы бекітілген Астана дизайн-кодына сәйкес келмейді.
Нұра ауданының әкімдігі «Астана-Жарнама» КММ-мен бірлесіп 9 тұрғын үй кешенінде («Құлагер», «Жағалау-3», «Құлагер-2», «Көркем Tower») орналасқан ШОБ субъектілерінің тілдер туралы заңның сақталуы және заңсыз жарнаманың жойылуын тексеріп шықты. Нәтижесінде 26-28 шілде күндері 91 жарнама мен 30 маңдайша демонтаждалды.
Сондай-ақ, 36 хабарлама беріліп, 3 тұрғын үй кешенінде («Aru Qala», «Манхэттен», «Манхэттен») орналасқан маңдайшаларды дизайн-кодқа сәйкестендіру бойынша іс-қимыл алгоритмі табысталды.
Ал, Сарыарқа ауданында заңсыз ілінген 382 жарнама мен маңдайша алынып тасталды.
Байқоңыр ауданында жыл басынан бері аппарат қызметкерлері түсіндіру және заңсыз жарнамаларды бөлшектеу бойынша 40-тан астам көшпелі іс-шара өткізді. Қорытындысы бойынша бүгінгі күні 300-ге жуық заңсыз жарнама объектісі бөлшектелді.
Қалған аудандарда да осы бағыттағы жұмыс қарқынды жүріп жатыр. Осылайша, бір апта ішінде әкімдік қызметкерлерінің жұмысының нәтижесінде дизайн-кодқа сәйкес келмейтін 800-ге жуық заңсыз ілінген баннерлер мен маңдайшалар алынып тасталды.
Айта кетейік, 2019 жылдың желтоқсан айында қала мәслихаты дизайн-кодты бекіткен. Алайда, пандемияға байланысты жұмыс кейінге шегерілген. Биыл 4 сәуірінде Астана қаласын дамыту мәселелері жөніндегі кеңесте Президент Қ. Тоқаев көше жарнамасын орналастыруға қойылатын талаптардың сақталуын бақылауды күшейту туралы тапсырма берген болатын.
Вам может быть интересно: «Украина и Польша вызвали послов друг друга»
