ШҚО ТЖД Ұлан ауданында жанған өртті сөндіруге өрт сөндіру пойызын жұмылдырды

2023 жылғы 5 тамызда Ұлан ауданының Смолянка ауылының шетінде таулы жерде шөп пен бұталар өртенді, деп хабарлайды ШҚО ТЖД баспасөз қызметі. 

Жел оттың таралу қаупін тудырды. Өртті сөндіруге жедел түрде орманшылар, жергілікті атқарушы органдар мен ШҚО ТЖД жеке құрамынан 71 адам мен 10 бірлік техника жұмылдырылды.

"Қазавиаорманкүзеті" МИ-2 тікұшағымен жетуі қиын жерге өрт сөндіру десанты жеткізілді.

Сонымен қатар ШҚО ТЖД өрт шыққан орынға құрамында 10 адамы бар "КТЖ ҰК" өрт сөндіру пойызын жіберу туралы шешім қабылдады.

Өрттің таулы, жартасты жерде орын алуы сөндіру жұмыстарын қиындатты.

Бірлескен іс - қимылдар арқасында жақын маңдағы елді мекенге өрттің таралу қаупі сейілді.

20 сағат 35 минутта шамамен 9 га аумақта өрттің оқшауланғаны хабарланды.