1,2 млрд теңгеден астам сомаға жалған шот-фактуралар әзірлеген астаналық сотталды
4 қазанда Астана қаласы Сарыарқа ауданының №2 аудандық соты жалған шот-фактуралар жазып беру фактісі бойынша И-ге қатысты айыптау үкімін шығарды, деп хабарлайды елордалық соты.
И 2020 және 2022 жылғы 1 тоқсанда контрагент – кәсіпорындар салық түрінде төлемеген 1 млрд 217 млн теңге сомасында мемлекетке аса ірі залал келтіре отырып, бақылаудағы 10 кәсіпорынның атынан іс жүзінде жұмыстарды орындамай, қызметтер көрсетпей, тауарларды жөнелтпей шот-фактуралар әзірлеуді ұйымдастырған.
«И қылмысты ұйымдастырушы ретінде кәсіпорындарды сатып алып, тіркеген және олар арқылы жалған шот-фактуралар әзірлеген. Осындай қызметтерге мұқтаж контрагенттерді іздеп, олармен мәміле шарттарын талқылап, содан кейін қолма-қол ақшаға айырбастап отырған», - деп жазды ведомство.
Сотталушы кінәсін толық мойындады. Бұдан басқа, оның кінәсі куәлардың айғақтарымен, қосылған құн салығының нәтижелерімен, сот-экономикалық сараптаманың қорытындысымен, Мемлекеттік кіріс департаменті мамандарының қорытындыларымен және істің басқа да материалдарымен дәлелденді.
ҚК-нің 216-бабы 3-бөлігінің санкциясы 7 жылға дейінгі мерзімге бас бостандығынан айыру түріндегі жазаны көздейді. Сот қылмыстық жауаптылық пен жазаны жеңілдететін мән-жайлар ретінде кінәні мойындауы мен шын өкінуін таныды.
И-дің әрекеттерінде қылмыстардың қайталануы жауапкершілікті ауырлататын жағдай болып табылады, өйткені ол бұрын ауыр қылмыс жасағаны үшін сотталған және қайтадан ауыр қылмыс жасаған.
Көрсетілген мән-жайларды ескере отырып, жеңілдететін және ауырлататын мән-жайлардың болуын ескерген сот И-ға коммерциялық ұйымдарда басшы лауазымдарды атқаруға, оның ішінде 6 жыл мерзімге шот-фактураларды әзірлеуге байланысты лауазымдарды атқаруға тыйым салды. Сонымен қатар ең жоғары қауіпсіздік қылмыстық-атқару жүйесі мекемесінде 4 жылға бас бостандығынан айыру түріндегі жаза тағайындады.
Мүлікті тәркілеу оған қолданылмады, өйткені сотқа дейінгі тергеп-тексеру барысында сотталған адамның қылмыстық жолмен алынған немесе қылмыстық жолмен тапқан қаражатына сатып алынған мүлкінің болуы анықталмады.
Іс бойынша азаматтық талап қойылған жоқ.
Үкім заңды күшіне енген жоқ.
Вам может быть интересно: ««ҚазжолҒЗИ» әр өңір үшін жол төсемдерінің үлгілік конструкцияларын қалыптастырылады»
