Маңғыстау облысының Маңғыстау ауданына жаңа әкім тағайындалды
Маңғыстау облысы Маңғыстау ауданына жаңа әкім болып Ғалымжан Мұқырұлы Ниязов тағайындалды. Бұл туралы облыс әкімінің баспасөз қызметі мәлім етті.
«15 қыркүйекте Маңғыстау облысының әкімі Нұрлан Ноғаев мәслихат депутаттарына өз еркімен жұмыстан босатуға өтініш берген Тілек Көшмағамбетовтың орнына жаңа кандидатура ұсынды. Аудан әкімі лауазымына Ғалымжан Ниязов үміткер болды, оның кандидатурасы ҚР Президенті Әкімшілігімен келісілді» делінген баспасөз мәліметінде.
Ғалымжан Ниязов Қ. Сәтпаев атындағы Қазақ ұлттық политехникалық университетін «Полиграфиялық машиналар және автоматтандырылған кешендер» мамандығы бойынша, сондай-ақ Ш. Есенов атындағы Ақтау мемлекеттік университетін «Өнеркәсіптік, азаматтық құрылыс және қала шаруашылығы» мамандығы бойынша бітірген.
Еңбек жолын 1990 жылы Форт-Шевченко қаласындағы АТП-1-де бастаған.
1991 жылдан 2002 жылға дейін мұнай және құрылыс саласындағы бірқатар коммерциялық ұйымдарды басқарды.
2002-2006 жылдары – «Құрылысконсалтинг» Ұлттық орталығы» АҚ Маңғыстау облыстық филиалының бас менеджері, лицензиялық құжаттардың аудиті және сараптамасы бөлімінің жетекші маманы болды.
2006-2008 жылдар аралығында Маңғыстау облысы мемлекеттік сәулет-құрылыс бақылау басқармасы басқармасы лицензиялар бөлімінің бас маманы болды.
2008 жылдан 2012 жылға дейін Маңғыстау облысы құрылыс басқармасының бөлімінде бас маман, Мемлекеттік сатып алу бөлімінің бас маманы, құрылыс басқармасы басшысының орынбасары болып жұмыс істеді.
2012-2013 жылдары – Қызылорда облысында құрылыс бөлімінің басшысы, құрылыс басқармасы басшысының орынбасары; 2014-2016 жылдары – Қызылорда облысының мемлекеттік сатып алу басқармасының басшысы; 2016 жылдан 2017 жылға дейін – «СК-Фармация» ЖШС департамент директоры қызметін атқарды.
2017 жылдан 2020 жылға дейін Ақтау қаласының әкімі, 2020 жылдың маусым айынан бүгінгі күнге дейін – Маңғыстау облысы әкімінің орынбасары лауазымында болды.
Вам может быть интересно: «США объявили о новых санкциях в отношении России»
