Азаматтық авиация субъектілерін отынмен қамтамасыз ету туралы
ҚР Индустрия және инфрақұрылымдық даму вице-министрі Б.С. Камалиев және ҚР Энергетика вице-министрі Ә.М.Мағауов отандық әуежайлар, әуе компаниялары және авиаотынды жеткізуші ірі компаниялар өкілдерінің қатысуымен азаматтық авиация мұқтаждықтары үшін авиаотынмен қамтамасыз етудің қазіргі жағдайына арналған кеңес өткізді.
Жиын барысында вице-министр Берік Камалиев барлық әуежайлар, Эйр Астана, СКАТ, Qazaq Air әуе компаниялары, ҚазМұнайГаз және ҚазМұнайГаз-Аэро компаниялары басшыларының баяндамаларын тыңдап, отынның қалған көлемі, қажеттіліктері, ағымдағы және алдағы айларға арналған жоспарлары туралы хабардар етті.
Энергетика вице-министрі Әсет Мағауов ПМХЗ жұмысының мерзімінен бұрын қайта басталғаны, алдағы қараша айында 46-48 мың тонна көлемінде авиаотын өндіруді жоспарлап отырғаны және Ресей зауыттарының елімізге 10 мың тонна авиаотын экспорттауға дайын екені туралы хабардар етті.
Әуежайлардың, ҚазМұнайГаз-Аэро компаниясының басшылары әуежайлар мен мұнай базаларында, оның ішінде Нұр-Сұлтан (3,1 мың тонна), Атырау (3 мың тонна), Ақтау (2,5 мың тонна), Ақтөбе (1,1 мың тонна) қалаларында авиаотын қорының бар екенін және отандық әуе компаниялары үшін авиа отын беруге дайындығын растады.
Авиаотын нарығындағы жағдай тұрақталғанға дейін ҚР Энергетика министрлігі ҚР ИИДМ-мен бірлесіп әуежайлардағы авиаотын қалдықтарына тәуліктік мониторинг жүргізіп, бақылап отырады.
Кеңес қорытындысында ҚР Индустрия және инфрақұрылымдық даму вице-министрі Б.Камалиев жолаушыларды тұрақты тасымалдауды қамтамасыз етіп, өндірілетін авиаотынды түпкілікті тұтынушыларға жеткізуді тапсырды.
Вам может быть интересно: «Қазақстанда 20 жыл ішінде кедейлік деңгейі 9 есеге жуық төмендеді»
