Ермек Маржықпаев белгілі файтер Шавкат Рахмоновты қабылдады
UFC ұйымында өнер көрсететін танымал қазақстандық файтер Шавкат Рахмоновты ҚР Туризм және Спорт министрі Ермек Маржықпаев қабылдады. Бұл туралы министр әлеуметтік желідегі парақшасында жазды.
«Аралас жекпе-жек әлеміндегі ең беделді ұйым – UFC-де өнер көрсетіп, жасындай жарқырап жүрген даңқты спортшымыз Шавкат Рахмоновпен кездесіп, кейінгі жарқын жеңісімен құттықтадым. Былтыр Тәуелсіздік күні қарсаңында ол АҚШ файтері Стивен Томпсонды жеңген болатын. Шавкат – мұхиттың арғы бетінде өткізген жекпе-жектері арқылы елімізді бүкіл әлемге танытып жүрген батырымыз. Шавкатқа алдағы уақытта жеңісті жолын сәтті жалғап, тезірек әлем чемпионы болуына тілектеспін», - деп жазды министр.
Естеріңізге сала кетейік, Шавкат Рахмонов соңғы жекпе-жегін өткен жылы желтоқсан айында америкалық Стивен Томпсонмен өткізіп, қарсыласын екінші раундта қылқындыру әдісімен жеңді.
Осылайша ол кәсіпқой мансабындағы 18-ші жеңісіне қол жеткізсе, Стивен Томпсон 7-ші рет жеңіліске ұшырады.
Осы жеңісінен кейін қазақстандық файтер UFC-дің жартылай орта салмақ санатындағы рейтингісінде 3-орынға көтерілді. Оның алдында Белал Мұхаммад (2-орын), Камару Усман (1-орын) және чемпион Леон Эдвардс орналасқан. Колби Ковингтон 5-орынға сырғыды.
Вам может быть интересно: «Костенко шахтасының 9 лауазымды тұлғасы күдікті деп танылып отыр – Бас прокуратура»
