Қазақстан ДЗМҰ Ассамблеясының алаңдарында географиялық көрсеткіш ретінде Алматы апортын ілгерілетуде
Ағымдағы жылдың 5 шілдесінде Женева қаласында Дүниежүзілік зияткерлік меншік ұйымының (ДЗМҰ) Бас директоры Дарен Тангпен кездесуде Қазақстан Республикасының Әділет министрі Азамат Есқараев қазақстандық географиялық көрсеткішті насихаттау және ілгерілету мақсатында кездесуге қатысушыларға "Апорт" шырынды алмасының дәмін татуды мақтанышпен ұсынды. ДЗМҰ өкілдері алманың дәмі мен хош иісін бағалап, олардың жоғары сапасы мен бірегейлігін атап өтті.
Географиялық көрсеткіш белгілі бір географиялық аймақтарда өндірілетін өнімдер үшін тиімді қорғаныс және артықшылық құралы болып табылады. "Апорт" алма сортын географиялық көрсеткіш ретінде тіркеу бірқатар артықшылықтарды қамтамасыз етеді.
Ең алдымен, бұл бірегейлікті қорғау. Географиялық көрсеткіш Қазақстанның нақты өңірінің белгілі бір табиғи және климаттық жағдайларына байланысты "Апорт" алмасының бірегей сипаттамалары мен сапасын қорғауға мүмкіндік береді. Бұл басқа жерде өсірілген алмалар үшін "Апорт" атауын теріс пайдалануға жол бермейді.
"Апорт" алма сортын географиялық көрсеткіштер тізіміне қосу осы сорттың нарықта танылуын арттыруға ықпал етеді және тұтынушылардың сенімін арттырады. Олар "Апорт" алмасының түпнұсқалығы мен сапасына сенімді болады және өнімді географиялық көрсеткіші бойынша оңай анықтай алады.
Сонымен қатар, географиялық көрсеткішті қорғау және ілгерілету ауылдық жерлерді дамытуға, жұмыс орындарын құруға, сондай-ақ халықаралық нарықта өнімді жылжытуға ықпал етеді.
Әділет министрі А.Н. Есқараев "Апорт" алма сортын географиялық көрсеткіштер тізіміне енгізу ауыл шаруашылығын дамытуда және өндірушілерді қолдауда маңызды рөл атқаратынын атап өтті. Бұл бастама экономикалық өсуді, туризмді дамытуды ынталандырады, өндірушілердің құқықтарын қорғайды және Қазақстан Республикасында алманың бірегей сорттарын дамытуды қолдайды.
Вам может быть интересно: «Узбекистан планирует нарастить экспорт туристических услуг до $2 млрд»
