Алгоритм оңдасын!

Медициналық қызметтер саласында персонализация ерекше маңызды болып табылады. Емдеудің тиімділігі адам ағзасының ерекшеліктеріне байланысты, сондықтан медициналық қызмет көрсетушілер барынша даралануға ұмтылады. Бұл жолда оларға заманауи технологиялар, әсіресе жасанды интеллект (AI) көмектеседі. The Boston Consulting Group сарапшыларының пікірінше, AI қолдану денсаулық сақтау саласына үлкен серпін бере алады. Жасанды интеллект қолданыстағы емдеу әдістерінің тиімділігін арттырып, жаңа препараттарды әзірлеуді тездетеді және медициналық қызметтерге қолжетімділікті кеңейтеді.

Сонымен бірге емделушілер медицинаға цифрлық технологиялардың кеңінен енгізіліп жатқанынан қауіптенеді. Көптеген адамдар денсаулыққа қатысты шешімдерді алгоритмдер қабылдауы мүмкін болашақтан қорқады. Анализ қорытындыларының бұрмалануымен және құпия деректердің сыртқа шығып кетуімен байланысты тәуекелдер сарапшыларды да, пациенттерді де алаңдатады. Бір жағынан, бұлай қорқудың негізі де жоқ емес: денсаулық сақтау ұшқалақтықты көтермейді. Екінші жағынан, AI енгізу орасан зор артықшылықтар бере алады: диагностиканы дәлірек жасау, дараланған емдеу және медициналық көмек көрсетуді жақсарту. Ең бастысы, AI арқасында халықтың көбірек топтары үшін медициналық қызметтер қол жетімдірек бола түседі.

Ақылды әрі пайдалы

Заманауи технологиялардың төңкеріс жасаған әлеуеті қазірдің өзінде фармацевтикада көрінді. Егер AI болмаса, адамзат қысқа уақыт ішінде коронавирустық пандемиямен күреспес еді. Ғалымдарға ковидке қарсы вакцинаны тез әзірлеуге және шығаруға мүмкіндік берген цифрлық технологиялар болды. Ақпаратты өздігінен шығара алатын генеративті AI қолдану дәрі-дәрмектің дамуы мен клиникалық сынақтарда төңкеріс жасады. Бүгінгі таңда дәрі-дәрмекті ойлап табу небәрі 18 айға созылуы мүмкін — бұл бірнеше жыл бұрын фармацевтикалық компаниялар талап еткен уақыттан әлдеқайда азырақ. AI енгізудің арқасында әзірлеу шығындары да еселеп азайды.

Ауруларды диагностикалауда да осындай төңкеріс орын алуда. AI қазірдің өзінде қатерлі ісіктің кейбір түрлерін диагностикалауда рентгенологтардан асып түседі. Стартаптар мен ірі технологиялық компаниялар AI негізіндегі онкологиялық шешімдермен белсенді жұмыс істеуде. Бұл шешімдер қатерлі ісіктерді ертерек және дәлірек анықтау үшін алгоритмдерді пайдаланады. BCG жақын болашақта AI науқастың жағдайын нақты уақыт режимінде бақылай алады деп болжайды. Деректерді талдаумен бірге бұл пациенттерге медициналық араласуды қажет ететін уақытты анықтауға көмектеседі.

AI медициналық күтімге мұқтаж емес адамдар үшін де пайдалы. Мобильді қосымшалар бүгінгі күні жақсы әдеттерді ынталандыру және пайдаланушылардың белсенділігі мен өмірлік функцияларының негізгі параметрлерін бақылау арқылы саламатты өмір салтын қалыптастыруға көмектеседі. AI арқасында бұл қолданбалар үнемі жетілдірілуде, бұл пайдаланушыларға дәрігерлердің көмегіне жүгінбестен өз денсаулығын бақылауға көмектеседі. Сонымен қатар, BCG мынаны атап өтеді: тіпті ең озық AI адам коммуникациясын алмастыра алмайды. Эмпатия медицинаның маңызды құрамдас бөлігі болып табылады, сондықтан дәрігерлер сұранысқа ие болып қала бермек.

Генеративті AI-ны тек фармацевтикалық компаниялар, денсаулық сақтау провайдерлері мен қолданбаларды әзірлеушілер ғана қолданбайды. AI сақтандыру саласын да өзгертеді. AI сақтандыру компанияларына тәуекелдерді болжауға, математикалық модельдерді құруға және клиенттермен қарым-­қатынас орнатуға көмектеседі. AI нақты полис ұстаушының денсаулығына қауіп төндіретін негізгі қауіптерді анықтау үшін пациенттің медициналық тарихын, демографиялық және әлеуметтік факторларды шебер пайдаланатын болады.

Мемлекеттік және қоғамдық денсаулық сақтау ұйымдары да AI-ны өз қызметіне қоса алады. Оны пайдалану денсаулық сақтау ресурстарын жоспарлау мен бөлуді жақсартуға мүмкіндік береді. Мысалы, AI белгілі бір вирустардың пайда болуы мен таралуы туралы сарапшылар мен шенеуніктерді ескертуге қабілетті. Коронавирустық пандемияның денсаулық сақтау мен экономикаға келтірген зиянын ескерсек, мұндай көмек өте құнды.

Сенімді қарым-­қатынас

Әрине, цифрлық технологияларды ойланбастан енгізу мүмкін емес. Кез келген басқа технология сияқты AI де қателіктер жібере алады. AI шешім қабылдау үшін пайдаланатын деректер де қате болуы мүмкін. AI — бұл жаңа технология, сондықтан ол шығаратын нәтижелер екі рет тексерілуі керек. Деректердің құпиялылығы мәселелері ерекше назар аударуды қажет етеді. AI қолданатын денсаулық сақтау компанияларының емделушінің денсаулығы туралы ақпараттың қауіпсіз қорғалуын қамтамасыз етуі маңызды.

Пациенттердің цифрлық технологияларға деген сеніміне келетін болсақ, оны бірте-­бірте қалыптастыру керек деп хабарлайды BCG. Адамдардың алаңдаушылығы зейін қоюды қажет етеді — денсаулықтан қымбат ештеңе жоқ. Медициналық қызмет көрсетушілер ауруларды диагностикалау мен емдеудегі AI рөлі туралы сұрақтар қоятын науқастармен ашық болуы керек. Дәрігер мен пациент арасындағы сенім — медициналық ұйымдар жұмысының ең маңызды тұсы. AI-ны парасатты қолдану оны күшейте алады..