Алматы ауданындағы мектептер мен колледждердің 30-дан астам директоры марапатталды

Елорданың Алматы ауданында "Ұстазым – ұлағатты өнегем" атты мерекелік іс-шара өткізіліп, қаланың үздік мұғалімдеріне құрмет көрсетілді. Қала мектептері мен колледждерінің 30-дан астам директоры алғыс хаттармен және естелік сыйлықтармен марапатталды, деп хабарлайды Нұр-Сұлтан әкімдігінің ресми сайты.

"Мемлекет білім мен ғылымға көп көңіл бөледі. Биыл біздің ауданда екі мектеп ашылды. Ұзақ үзілістен кейін біз дәстүрлі оқыту форматына оралып жатырмыз. Мұғалімдерді кәсіби мерекелерімен құттықтай отырып, оларға зор денсаулық және барлық бастамаларына табыс тілеймін", - деді Алматы ауданының әкімі Ерлан Бекмурзаев.

Nur Otan партиясы елордалық филиалы төрағасының бірінші орынбасары Сақтаған Сәдуақасов атап өткендей, қоғамдағы педагог мәртебесі өте жоғары болуы тиіс.

"Біздің партияның сайлауалды бағдарламасында жаңа мектептер салуға, мамандар тартуға, білім беру саласының проблемаларын шешуге жәрдемдесу көзделген. 2019 жылы педагогтердің мәртебесі туралы заң қабылданды, 2021 жылдан бастап оқытушылардың жалақысы артты", - деді ол.

Ахмет Байтұрсынов атындағы №48 мектеп-лицейінің директоры Зәуре Садықова кәсіби деградация болмас үшін алға ұмтылу және барлық уақытта даму керектігін айтады. Айтпақшы, оның туыстарының жалпы педагогикалық тәжірибесі 415 жылды құрайды.

"Биыл мен 40-шы оқу жылын бастаймын. Мектепті жақсы көремін, әлі күнге дейін араласамын. Жақында олар менің 60 жылдық мерейтойымда болды. Өзім орыс тілі мен әдебиетінің мұғалімімін. Менің ойымша, біздің мамандығымыздың бар құпиясы - әрқашан алға ұмтылу, батыл болу және белсенді өмір салтын ұстану. Мен сурет саламын, ән айтамын, өлең жазамын, ән жазамын және барлық жақсылықтар алда екеніне сенемін", - дейді Зәуре Садықова.

Айта кету керек, іс-шара барлық санитарлық нормаларды сақтай отырып өткізілді.

Еске сала кетейік, бұған дейін елорда әкімі Нұр-Сұлтанның үздік педагогтерімен кездесіп, оларға марапаттар табыстаған болатын. "Нұр-Сұлтан қаласының құрметті педагогі" деп танылған мұғалімдер 1 млн теңге көлемінде ақшалай сыйлықтар берілді. Сондай-ақ "Қазақстан Республикасы білім беру ісінің құрметті қызметкері", "Ы.Алтынсарин" төсбелгісімен және алғыс хаттармен марапатталды. Ал үш оқу орнына - №7 "Аққу" балабақшасы, №85 мектеп - лицейі мен Astana Polytechnic жоғары колледжіне 7 млн теңгеден гранттар берілді.