Қазақстанда кафе-мейрамханадағы баға бір жылда 23% қымбаттаған

Бейнеу аудандық полиция бөлімі бастығының орынбасары ұсталды

Елімізде қоғамдық орындарда тамақтану кезінде көрсетілетін қызмет түрі қымбаттаған, деп хабарлайды Ranking.kz ресурсы.

Өткен жылдың қарашасында қоғамдық тамақтану ұйымдарының қызметі бір айда 2,7%-ға, ал бір жылдың ішінде 23,4%-ға қымбаттады.

Әсіресе баға өсімін Жетісу облысының тұрғындары қатты сезінді. Аталған өңірде бірден 13,9%-ға өскен.

Сондай-ақ, үштікке Шымкент және Алматы облысы да кірді. Онда бір айда 9,9% және 7,3%-ға артқан. Жеті өңірде бір айдың ішінде баға өзгермеген.

Жылдық динамикада бағаның қатты өсімі сол Жетісу облысында тіркелді. Қызмет көрсету құны бірден 44,7%-ға артқан.

Одан бөлек, Шымкент (40,3%) пен Астанада (38,5%) баға айтарлықтай өскен. Ең төмен баға Павлодар облысында байқалды, жыл ішінде 6,2%-ға артқан.

Қоғамдық тамақтану объектілері арасында асхана қызметі бір жылда 26,6%-ға, жылдам тамақтану орындарында 17,1%-ға, мейрамхана, дәмхана және соған ұқсас мекемелерде 20,6%-ға қымбаттады.

Оның ішінде мейрамханада түскі ас құны 19%-ға, ал асханада 26,6%-ға өсті.

Мейрамхана мен дәмханада қызмет көрсету бағасының ең жоғары жылдық өсімі Жетісу облысында (44,4%), ең төмені Алматыда (5,2%) тіркелді.

Жылдам тамақтану орындарында қызмет бағасының елеулі өсімі Атырау облысында (38%), ал арзаншылық Павлодар облысында (4,5%) байқалды.

Асхана қызметі бойынша жоғары баға Жетісу облысында (52%), ең төменгісі Павлодар облысында (7%).

Сонымен қатар, өткен жылдың үшінші тоқсанының қорытындысы бойынша мейрамханалар мен қоғамдық тамақтандыру орындарын жалға алу құны бір жылда 5%-ға өсті.