Десанттық-шабуылдау әскерлері полигондарға көп шақырымдық марш жасайды
Десанттық-шабуылдау әскерлерінің құрамалары мен бөлімдерінде бақылау тексерісі өтіп жатыр, деп хабарлайды ҚР Қорғаныс министрлігінің баспасөз қызметі. Аталған іс-шаралар Мемлекет басшысы Қасым-Жомарт Тоқаевтың Қарулы күштердің жауынгерлік қабілетін түбегейлі арттыру жөніндегі тапсырмаларын іске асыру аясында өткізілуде.
Десантшылар полигондарға көпшақырымдық марш жасайды. Оның ішінде, Алматы, Талдықорған гарнизондары әскери бөлімдерінің жеке құрамы «Іле» полигонына, Қапшағай гарнизонының десантшылары «Шошқалы» полигонына жіберіледі. Әскерлердің жауынгерлік техникамен қозғалысы түнгі уақыттарда әскери авиация тікұшақтарының бүркемелеуімен және жедел бүркемелеу шараларын сақтаумен жүзеге асырылатын болады.
Марш жасау жауынгерлік және арнайы техникалардың техникалық жағдайын, сондай-ақ механик-жүргізушілердің дайындық деңгейін объективті бағалауға мүмкіндік береді.
Десанттық-шабуылдау әскерлері құрамалары мен бөлімдерінің басшылық құрамы қозғалыс кезінде бөлімшелерді басқару, барлау, коменданттық қызметті ұйымдастыру, тосқауыл шебін еңсеру мен маршты жан-жақты қамтамасыз ету тәжірибесін игеретін болады.
Әскери қызметшілер шартты аудандарға келгеннен кейін түрлі жауынгерлік іс-қимылдардан тұратын оқу-жауынгерлік міндеттерді орындайды. Тапсырмалардың мазмұны оларды орындау алдында ғана бөлімшелерге белгілі болады. Бұл командирлердің өз бетінше шешім қабылдауға дайындығын бағалауға мүмкіндік береді.
Бақылау тексерісінің басты мақсаты әскери қызметшілердің күрделі жауынгерлік жағдайда іс-қимыл жасауға әзірлігін, Десанттық-шабуылдау әскерлері бөлімшелерінің оқу-жаттығу деңгейі мен үйлесімдігін бағалау болып отыр.
Биылғы сәуір айында Қарулы күштерде бақылау тексерісі жаңа пішінде жүргізіледі. Құрамалар мен бөлімдер полигондарға шығып, оқу-жауынгерлік тапсырмаларды орындайды. Тексеріс нәтижесі бойынша бөлімшелердің жауынгерлік әзірлігі бағаланады.
Вам может быть интересно: «Евросоюз объявил 19 российских дипломатов персонами нон грата »
