Әлихан Смайылов Сауда және интеграция министрлігінің ұжымына жаңа басшыны таныстырды

ҚР Премьер-Министрі Әлихан Смайылов Сауда және интеграция министрлігінің ұжымына жаңа басшы – Премьер-Министр орынбасарының міндетін атқарушы – ҚР Сауда және интеграция министрі Серік Жұманғаринді таныстырды. Бұл туралы primeminister.kz сайты хабарлайды.

Үкімет басшысы бүгінге дейін Бәсекелестікті қорғау және дамыту агенттігін басқарған Серік Жұманғариннің басшылық қызметте үлкен тәжірибесі бар екенін атап өтті.

«Серік Мақашұлы – жауапты және талапты адам, оның өзін осындай жауапты қызметте көрсете алатынына сенімдімін», — деді Әлихан Смайылов.

Премьер-Министрдің айтуынша, Мемлекет басшысы экономиканы дамытуда, көрші елдермен тығыз экономикалық және интеграциялық байланысты нығайтуда сауда саласының маңызы зор екенін атап өткен.

«Министрліктің алдында маңызды міндеттер тұр. Әрине, бұл ішкі сауданы дамыту және реттеу, сауда инфрақұрылымын жетілдіру, биржалық және электрондық сауданы кеңейту», — деді Әлихан Смайылов.

Үкімет басшысының сөзінше, оған қоса тұтынушылардың құқығын қорғауға, шикізаттық емес тауарлар мен қызметтер экспортын дамытуға және ілгерілетуге, сондай-ақ техникалық реттеу және стандарттау саласындағы жұмысқа үлкен назар аудару қажет.

«Әлеуметтік маңызы бар тауарлар бағаларын мониторингтеу және оларды тұрақтандыру жөнінде шаралар әзірлеу – қоғамдағы ерекше назар аударуды қажет ететін мәселе. Серік Мақашұлы, Мемлекет басшысының жоғары сенімін ақтайсыз деп үміттенеміз», — деп түйіндеді Премьер-Министр.

Ведомствоның бұрынғы басшысы Бақыт Сұлтанов Сауда және интеграция министрлігінің ұжымына бірлескен жұмыс үшін алғыс айтып, Серік Жұманғаринге жаңа қызметінде табыс тіледі.

Еске салайық, бүгін Президент Жарлығымен С. Жұманғарин Бәсекелестікті қорғау және дамыту агенттігінің төрағасы лауазымынан босатылып, ҚР Премьер-Министрінің орынбасары – Сауда және интеграция министрінің міндеттерін атқарушы болып тағайындалды.

Сондай-ақ Мемлекет басшысы Бақыт Сұлтановты ҚР Премьер-Министрінің орынбасары – Сауда және интеграция министрі қызметінен босатты.

: Если вы обнаружили ошибку или опечатку, выделите фрагмент текста с ошибкой и нажмите CTRL+Enter
1901 просмотров
Поделиться этой публикацией в соцсетях:

Орфографическая ошибка в тексте:

Отмена Отправить