Азық-түлік бағасы, инфляция, көрсетілетін қызметтер құны қаншалықты өсті – Ұлттық банк мәліметтері

Алматинцев просят воздержаться от похода в горы

2022 жылғы қаңтарда айлық инфляция 0,7% деңгейінде қалыптасты, жылдық өсу қарқыны 8,5% - ға дейін жеделдеді, деп хабарлайды ҚазАқпарат ҚР Ұлттық банкінің баспасөз мәліметтеріне сілтеме жасап.

Баспасөз қызметінің мәліметтеріне қарағанда, азық-түлік және азық-түлік емес инфляция 2021 жылғы желтоқсан деңгейінде сақталды. Ақылы қызметтер инфляциясы тұрғын үйді жалдау құнының неғұрлым жоғары өсуі аясында жеделдеді. 2022 жылғы қаңтарда тұтыну бағалары 0,7% – ға өсті, жылдық мәнде бағаның өсуі 8,5% - ға дейін жеделдеді (2021 жылғы желтоқсанда-8,4%).

Азық-түлік тауарлары бағасының жылдық өсуі өткен жылғы желтоқсан деңгейінде сақталып, 9,9% - ды құрады. 2022 жылдың қаңтарында нан өнімдері мен жарма, жемістер мен көкөністер тобында бағаның өсуі байқалды. Әлемдік нарықтардағы бағаның неғұрлым қалыпты өсуі аясында қант бағасының өсуі баяулады.

2022 жылғы қаңтардағы азық-түлік емес тауарлар бағасының жылдық өсу қарқыны да бұрынғы деңгейде (8,5%) сақталды. Сұраныстың артуы және компоненттердің, атап айтқанда микросхемалардың әлемдік тапшылығы аясында автомобильдер бағасының өсуі жеделдеді.

Сонымен қатар, 2022 жылдың қаңтарында импорттық бағаның өсуіне байланысты дәрі-дәрмектердің қымбаттауы байқалды. 2022 жылдың қаңтарында бензин, дизель отыны, сұйытылған газ бағасы төмендеді, бұл осы тауарлар бағасының жылдық өсу қарқынының баяулауына ықпал етті. Осылайша азық-түлік емес тауарлардың барлық тобы бағасының жылдық өсуін шектеді.

Ақылы қызметтердің жылдық инфляциясы 2022 жылғы қаңтарда 6,8% – ға дейін жеделдеді (2021 жылғы желтоқсан – 6,5% - ға өсу). Абаттандырылған тұрғын үйді жалға алу бағасы сұраныстың жоғары болуына байланысты өсе түсті. 2022 жылдың қаңтарында амбулаториялық қызметтердің қымбаттауы байқалды. 2022 жылғы қаңтарда реттелетін коммуналдық қызметтер Батыс Қазақстан облысында электр энергиясының қымбаттауы аясында аздап қымбаттады. Реттелетін қызметтердің қалған түрлерінің бағасы 2022 жылғы қаңтарда өзгерген жоқ.

Өңдеу өнеркәсібі мен ауыл шаруашылығында баға өсімі біршама баяулап, 2022 жылғы қаңтарда өңдеуші өнеркәсіптегі өндірушілер бағасының ел ішінде сатылатын өнім бағасының өсімі 17,5% – ға дейін (2021 жылғы желтоқсанда – 18,4%) баяулады.

Азық-түлік өндіруші кәсіпорындар арасында май, тоң май және қант өндірісі бағасының өсуі айтарлықтай баяулады. Екінші жағынан, бидайдың әлсіз шығымдылығы аясында нан-тоқаш және макарон өнімдерін өндірушілердің, сондай-ақ мал азықтық дақылдарының қымбаттауына байланысты ет пен сүт өнімдерінің бағасы аздап өсті.

Ауыл шаруашылығында 2022 жылғы қаңтарда өндірушілер бағасының өсімі 16,9% - ға дейін баяулады (2021 жылғы желтоқсанда – 17,3% - ға өсті). Өсімдік шаруашылығында бидай, арпа, жүгері және мал азықтық дақылдары бағасының өсуі қарқын ала түсті. Мал шаруашылығы өнімдерінің арасында шикі сүт бағасының өсуі баяулады және жұмыртқа өндірушілердің бағасы төмендеді.